साउन महिनाभरिको राशिफल

अाज श्रावण महिनाको एक गते । साउने सङ्क्रान्ति । अाउनुहवस्, यो महिना ग्रहगोचरका दृष्टिले कस्तो रहेछ, लेखाजोखा गराैं र महिनाभरिको योजना निर्माण गराैं –

मेष (चु, चे, चो, ला, लि, लु, ले, लो, अ) –

यो महिना चौथो सूर्य, आठौं शनि तथा मंगल र पाँचौं राहुको अशुभ प्रभाव रहने भएकाले श्रावण महिनामा सकारात्मक लक्षणको कमी हुनेछ । यस अवधिमा कडा मिहिनेत र परिश्रम गर्ने योग छ । निरन्तर गरिएको कष्टप्रद परिश्रमका कारण छिटै थाकिन्छ र कार्य क्षमतामा समेत कमी आउने छ । दुर्घटनाको सामान्य सम्भावना छ, त्यसैले सवारीसाधन हाँक्दा र बाटो काट्दा सावधान र सचेत रहनु बेस हुनेछ । तर चौथो भावमैं बसेको बुध र शुक्र ग्रह एवं पाँचौं भावको बृहस्पति र एघारौं भावको केतुले राम्रा परिणाम पनि प्रदान गर्नेछन् । समय प्रतिकूल हुँदाहुँदै आत्मविश्वासमा बृद्धि हुनाले लगातार सफलता प्राप्त हुने देखिन्छ । सम्मान र प्रतिष्ठा मिल्नेछ । घर परिवारमा माङ्गलिक कार्यको आयोजना हुनसक्छ । तर पाँचौं भावको गुरु र राहुको युतिले बुद्धिभ्रष्ट गराउने सम्भावना हुन्छ, त्यसैले रिस र आवेगमा नियन्त्रण गरेको जाति हुन्छ । यस महिनामा अरु दिनका तुलनामा ०१, ०२, ०९, १०, ११, १८, १९, २७, २८ र २९ गते तपाईंका लागि अशुभ दिन रहने छ ।

बृष (इ, उ, ए, ओ, बा, बि, बु, बे, बो) –

सामान्यतया श्रावण महिना शुभ महिना मान्दा हुन्छ । तेस्रो भावको सूर्य, बुध र शुक्र, अनि चौथो बृहस्पति तथा दसौं भावको केतु सकारात्मक लक्षण लिएर उपस्थित भएका छन् । तर सातौं भावको मंगल र शनिश्चर एवं चौथो राहुले अशुभ फल प्रदान गर्नेछन् । आमरूपमा यस महिनामा पारिवारिक जीवन सुखद रहनेछ । बहुप्रतीक्षित इच्छा, आकाङ्क्षा र उद्देश्य सफल हुनसक्छन् । ससाना यात्रा फलदायी र भाग्यशाली सिद्ध हुनेछन् । आकस्मिक रूपमा धनप्राप्तिको सम्भावना समेत छ । घरपरिवारका सदस्य, मित्र र नातागोता माझको सम्बन्ध सुदृढ हुनेछ । स्वास्थ्यका दृष्टिकोणले यस अवधिभरि राम्रै छ । तर चौथो राहु एवं सातौं मंगल र शनिश्चरको प्रभावले पारिवारिक समस्या र झैझगडाको परिस्थिति सिर्जना गर्नेछ । साझेदार वा सहयोगीले होच्याउने प्रयास गर्नेछन् । अरुले गरेको अनुत्तरदायी क्रियाकलाप र असफलताका कारण चिन्तित बन्नुपर्ने छ । खास गरी यस महिनाको ०२, ०३, ०४, ११, १२, १३, २०, २१, २२, ३० र ३१ गते तपाईंले सचेत भई कारोबार गर्नु राम्रो हुनेछ ।

मिथुन (का, कि, कु, घ, ङ, छ, के, को, ह) –

धनार्जनका दृष्टिले यो महिना उत्तम महिनाका रूपमा देखा परेको छ । सूर्यबाहेक सामान्यतया सबै ग्रहले सकारात्मक परिणाम प्रदान गर्नेछन् । आर्थिक रूपले यो उत्तम समय छ । व्यावसायिक कारोबारबाट लाभ मिल्नेछ । सामाजिक प्रसिद्धि प्राप्त हुनेछ । परिवारका सदस्यहरू सकारात्मक हुनेछन् । लगानीमा रहेको रकम फिर्ता आउनसक्छ । दार्शनिकता प्रति झुकाव बढ्ने छ र स्वभावमा गम्भीरता प्राप्त हुनेछ । रहस्यात्मक विषय र गूढ विज्ञानमा रूचि जाग्ने छ । तर सूर्य प्रतिकूल छ । यसको प्रभावले शारीरिक तनाव र बोझलाई झेल्नसक्ने सामथ्र्य हुँदाहुँदै पनि पारिवारिक झैझमेला र समस्या बढ्नाले मन विचलित हुनसक्छ र पारिवारिक जीवनमा निराशापना देखिने सम्भावना छ, तर घरायसी समस्या र परिवारजनका भावनालाई समेटेर अघि बढ्नु राम्रो हुनेछ । सूर्यको प्रभाव शुभ बनाउन दैनिक शुद्ध जल र मह तामाको पात्रमा राखी उदाउँदो सूर्यलाई अर्घ्य चढाउँदा शुभ परिणाममा अझ बृद्धि हुने संकेत छ । यस महिनाको ०५, ०६, १३, १४, १५, २२, २३, २४ र ३२ गते सचेत भई कार्य गर्नु राम्रो हुन्छ ।

कर्कट (हि, हु, हे, हो, डा, डि, डु, डे, डो) –

राशिमा सूर्य, बुध र शुक्रको सकारात्मक प्रभाव छ । दोस्रो भावको बृहस्पति र आठौं भावको केतुले पनि शुभ फल प्रदान गर्नेछ । तर पाँचौं भावको मंगल र शनिश्चरले मानसिक तनाव र छटपटी बढाउन सक्ने भए पनि यो महिना मूल रूपमा शुभ परिणामले नै बढावा पाउने परिस्थिति देखिन्छ । यस अवधिमा अचानक लाभप्राप्त हुने सम्भावना छ । पारिवारिक वातावरण सौहार्दपूर्ण हुनेछ । आकस्मिक भ्रमणबाट सफलता मिल्नेछ । प्रतिष्ठा र सम्मानमा अभिबृद्धि हुनेछ । सानातिना बिमारी र चोटपटकको सम्भावना छ । समग्रमा यो समय सुखसुविधाका लागि महत्त्वपूर्ण रहने छ । यद्यपि शनि, राहु र मंगल तपाईंको विपक्षमा देखिन्छन्, त्यसैले यस अवधिमा बुद्धि र विवेकले काम नगर्न सक्छ । व्यक्तिगत स्वास्थ्यमा समस्या आउन सक्छ । घरपरिवारकै सदस्यका कारण तनाव सिर्जना हुनेछ । जुवातास, लटरी र सट्टापट्टातर्फ नहौसिनु ठिक हुनेछ । खासगरी यस महिनाको ०७, ०८, ०९, १५, १६, १७, २५, २६ र २७ गते संयम भई व्यवहार गर्नु उपयुक्त हुनेछ ।

सिंह (मा, मि, मु, मे, मो, टा, टि, टु, टे) –

सूर्य, बुध र शुक्र जस्ता प्रभावशाली ग्रह बाह्रौं घरमा बसेको हुँदा श्रावण महिना तपाईंका लागि नकारात्मक महिना मान्दा हुन्छ । यस अवधिमा दाम्पत्य र प्रणय सम्बन्धमा निरसता अपनाउनु राम्रो हुनेछ । मानसिक उल्झन र तनावबाट ग्रसित रहनु पर्नेेछ । क्षणिक आवेग र उन्मादलाई नियन्त्रण गर्नु बेस हुनेछ । अचानक धनमालको हानि हुने सम्भावना छ । गलत निर्णयका कारण हानि हुनसक्छ । खर्चको मात्रा बढ्ने छ । व्यवसायिक स्थितिमा गिरावट आउनसक्छ । व्यक्तिगत स्वास्थ्य पनि अनुकूल हुनेछैन । नातागोताका सदस्य एवं मित्रवर्गसँग सुमधुर सम्बन्ध कायम राख्नु आवश्यक छ, अन्यथा एकआपसमा तनाव उत्पन्न हुनसक्छ । जुवातास, लटरी र सट्टापट्टातर्फ नहौसिनु ठिक हुनेछ । यद्यपि राशिमा बसेको बृहस्पति र सातौं केतुले आंशिक रूपमा शुभफल दिनेछन्, तर राशिको गुरुचाण्डाल योगका कारण बुद्धिले काम गर्ने संकेत छैन । विशेष गरी यस महिनाको ०१, ०२, ०९, १०, ११, १८, १९, २७, २८ र २९ गते तपाईंले अति नै सतर्क रहनु राम्रो हो ।

कन्या (टो, प, पि, पु, ष, ण, ठ, पे, पो) –

राहु र बृहस्पति बाहेक अन्य सबै ग्रह अनुकूल छन् । यस महिनाको २२ गते बृहस्पति पनि तपाईंको राशिमा प्रवेश गर्नेछ । जसले तपाईंका महत्त्वाकांक्षा र इच्छालाई बल प्रदान गर्नेछ । आमरूपमा यस महिनामा नातागोताका सदस्यहरू र मित्रवर्गबाट सहायता मिल्नेछ । करार र सम्झौताबाट लाभ मिल्नेछ । दाम्पत्य जीवन, घरायसी सुख, प्रेमसम्बन्ध र प्रणयप्रसङ्गका लागि पनि श्रेष्ठ समय हो । आय आर्जनका मार्गमा सुधार आउने छ । सञ्चार माध्यमबाट शुभ समाचार प्राप्त हुनेछ । जग्गाजमिनसँग सम्बद्ध कारोबारबाट लाभ प्राप्त हुने सम्भावना छ । शत्रु र प्रतिस्पर्धीले सामना गर्न सक्दैनन् । तर बाह्रौंभावमा बसेको बृहस्पति र राहुको गुरुचाण्डाल योगको प्रभावले खर्चको मात्रामा बृद्धि हुनाले अशान्त भइने छ । आफन्तहरूसित नै झैझगडा र विवाद हुनसक्छ । घरपरिवारका सदस्य तपाईंप्रति उदासीन रहने छन् । शत्रुले हानि पुर्याउने प्रयत्न गर्नेछन् । खास गरी यस महिनाको ०२, ०३, ०४, ११, १२, १३, २०, २१, २२, ३० र ३१ गते तपाईंले सचेत भई कारोबार गर्नु राम्रो हुनेछ ।

तुला (र, रि, रु, रे, रो, ता, ति, तु, ते) –

यो महिना अत्यन्त क्रियाशील र व्यस्त रहने र कर्मक्षेत्रको परीक्षणको समय हो । व्यापार र नोकरीका माध्यमबाट लाभ मिल्नेछ । हाकिम, मातापिता र वरिष्ठ व्यक्तित्वको सहानुभूति र आशीर्वाद मिल्नेछ । व्यवसायिक÷व्यापारिक दृष्टिले फलदायी यात्राको सम्भावना छ । यस अवधिलाई सन्तोषजनक समयका रूपमा लिन सकिन्छ । पितृधनबाट फाइदा उठाउन सकिनेछ । आम्दानी गरिएको धन मनोरञ्जनात्मक क्षेत्रमा खर्च हुनसक्छ । विगतमा गरिएको श्रमको समुचित मूल्याङ्कन हुनेछ । प्रतिष्ठित काम गर्ने अवसर जुर्नेछ । किनभने सूर्य, बुध र शुक्रले तपाईंको कर्मक्षेत्रमा प्रवेश गरेका छन् । तर दोस्रो भावमा पुगेको मङ्गल र शनि तथा पाँचौं केतुको प्रभावले आर्थिक आरोहअवरोह यथावत रहने छ । मुखलाई नियन्त्रणमा राख्नु बेस हुनेछ , नत्र अप्ठ्यारामा पर्न सकिन्छ । आर्थिक कठिनाइको सामना गर्नुपर्ने हुन्छ । आम्दानीका मार्गहरू पनि ठीक रहने छैनन् । बृहस्पति र राहुले शुभफलमा बढावा दिनेछन् । यस महिनाको ०५, ०६, १३, १४, १५, २२, २३, २४ र ३२ गतेका दिन अन्य दिनका तुलनामा अलि बढी सचेत हुनु राम्रो हुन्छ ।

बृश्चिक (तो, ना, नि, नु, ने, नो, या, यि, यु) –

भाग्य भावमा पुगेका सूर्य, बुध र शुक्र तथा राशिपति मंगल आफ्नै राशिमा आइपुगेकाले यस अवधिमा मिश्रित परिणाम प्राप्त हुने योग छ । लामो यात्रा सफल हुनेछैन । उच्च पदमा प्रतिष्ठित व्यक्तिहरूसित भेटघाट हुने तथा सल्लाह र सद्भाव प्राप्त हुने सम्भावना छ । मातापिता र अभिभावकवर्गको स्वास्थ्यस्थिति चिन्ताको विषय बन्नसक्छ । धार्मिक र सांस्कृतिक महत्त्वको क्षेत्रमा भ्रमण हुनेछ । विश्वासको वातावरण बन्नाले व्यावसायिक एवं रोजगारीका क्षेत्रमा सफलता आर्जन हुनेछ । धनार्जनका दृष्टिले समेत राम्रो छ । दसौं भावको बृहस्पति २२ गते एघारौं भावमा सर्दैछ, व्यापार, नोकरी वा कारोबारमा धेरै गरेको प्रयास सार्थक हुनेछ । व्यापारको विस्तार हुनेछ र पद बढ्ने छ । तर शनिको मध्य साढेसातीको चपेटामा हुनुहुन्छ, त्यसैले प्रत्येक काममा बाधा आउने र ढिलो हुने सम्भावना छ । कहिलेकाँही असुरक्षाको हीनभावना विकसित हुन सक्छ । सचेत हुनुहोला । यस महिनाको ०७, ०८, ०९, १५, १६, १७, २५, २६ र २७ गतेका दिन आंशिका रूपमा अशुभ फलको प्राप्ति हुने सम्भावना हुन्छ ।

धनु (ये, यो, भ, भि, भु, ध, फा, ढ, भे) –

राशिपति बृहस्पति भाग्यभावबाट २२ गतेका दिन कर्मक्षेत्रमा प्रवेश गर्दैछ । त्यसैले आंशिक रूपमा यो महिना सफल महिना नै छ, तर आठौं भावमा सूर्य, बुध र शुक्रजस्ता प्रभावशाली ग्रह बसेको हुँदा सतर्क र लगनशील भई कार्य गर्ने संकेत गर्दैछन् । अचानक विविध समस्या देखा पर्न सक्छन् । खानपान, आहारविहार र स्वास्थ्यप्रति सचेत रहनु बेस हुनेछ । शङ्कास्पद कारोबार र क्रियाकलाप सहभागी नबन्नु राम्रो हुनेछ, त्यस्तै खराब र अनैतिक मानिने कामभन्दा टाढा रहनु नै कल्याणकारी हुनेछ । महत्त्वपूर्ण कागजातमा हस्ताक्षर गर्नुअघि राम्ररी पढ्नु बेस होला । दुर्घटना र चोटपटकको सम्भावना पनि छ । बाह्रौं भावमा बसेको मंगल र शनिले पनि दुःख दिन्छन् । खर्चको मात्रामा अनायासै बृद्धि हुनेछ अनि मानसिक उल्झन र समस्या बढाउन सक्छन् । लक्ष्यप्रति भ्रमित रहनाले एकपटक हातमा आएको कामलाई मात्र महत्त्व दिएर त्यसैमा घोरिरहन सकिन्छ । विशेष गरी यस महिनाको ०१, ०२, ०९, १०, ११, १८, १९, २७, २८ र २९ गतेका दिन तपाईं अत्यन्त सचेत र सतर्क रहनु बेस हुनेछ ।

मकर (भो, ज, जि, खि, खु, खे, खो, गा, गि) –

सूर्य, बृहस्पति, राहु र केतु विपक्षमा रहेकाले यस महिनामा शुभफलको आशा नगर्नु नै बुद्धिमानी हुनेछ । यो अवधि मानसिक रूपले तनावग्रस्त र अस्वस्थ हुने सम्भावना भएकाले यस अवधिमा एउटा कठिन कालखण्ड हो भन्दा अत्युक्ति नहोला । कडा मिहिनेत गर्दा पनि राम्रो परिणाम हात पार्न सकिने छैन । व्यवसायिक÷व्यापारिक क्षेत्रमा रहेका नजिकका साथीभाइ र कामदारले धोका दिनसक्छन् र ठूलो नोक्सानी हुन सक्छ, सचेत रहनु आवश्यक छ, । घरपरिवारभित्रका वादविवाद, झैझगडा र समस्याहरूमा संयमता अपनाउनु राम्रो हुनेछ । यद्यपि एघारौं मङ्गल र शनिश्चर, सातौं भावको बुध र शुक्र असाध्यै सकारात्मक छन् । कष्टसाध्य समय हुँदाहुँदै मित्र र सहयोगीहरूबाट लाभ मिल्नेछ । बहुप्रतीक्षित इच्छा र आकाङ्क्षाले पूर्णता पाउने छन् र लामो दूरीको यात्रा लाभदायक रहने छ । आय आर्जनका मार्गमा बढोत्तरी हुनेछ । विलासिताका सामग्री र अन्य वस्तुहरू खरिद गर्नाले खर्च बढ्न सक्छ, तर घरायसी र पारिवारिक वातावरण सुखद हुनेछ । यस महिनाको ०२, ०३, ०४, ११, १२, १३, २०, २१, २२, ३० र ३१ गतेका दिन तपाईंले सतर्कता अपनाउनु बुद्धिमानी हुने संकेत छ ।

कुम्भ (गु, गे, गो, सा, सि, सु, से, सो, द) –

राशिमा रहेको केतु र बृहस्पतिका कारण महत्त्वाकांक्षा जाग्ने छ । उता दसौं भावमा बसेको मंगल र शनिश्चर तथा छैंटौं सूर्यको प्रभावले केही हदमा सकारात्मक फल पनि प्राप्त हुनेछ । पहिले देखिएका प्रायशः समस्याहरूको निराकरण हुनसक्छ । प्रतिस्पर्धीहरूमाथि विजय प्राप्त हुनेछ । पछाडि उछित्तो काड्ने र कुरा काट्नेहरू आफैं चुप लाग्नेछन् । नोकरी र व्यायसायिक जीवनमा सुधार आउने छ । प्रतिष्ठा र पदोन्नतिको सम्भावना छ । आफ्नो सर्कलमा सम्मान र साख मिल्नेछ । आत्मविश्वास बढ्नेछ । तर छैटौं घरमैं बसेको बुध र शुक्र, सातौं घरको गुरुचाण्डाल योग र राशिमा बसेको केतुका कारण खर्च नियन्त्रणभन्दा बाहिर हुनेछ । स्वास्थ्य सम्बन्धी कठिनाइ हुनसक्छ । शत्रु र प्रतिस्पर्धीले प्रतिष्ठा बिगार्ने प्रयास गर्नेछन् । कामको बोझ बढ्नाले थकानको अनुभूति हुनेछ । यसबाहेक व्यर्थका काममा समेत अल्मलिनु पर्नेछ । यस महिनाको ०५, ०६, १३, १४, १५, २२, २३, २४ र ३२ गतेका दिन तपाईंले सजग र सतर्क भई कार्य गर्नु राम्रो हुने संकेत छ ।

मीन (दि, दु, थ, झ, ञ, दे, दो, च, चि) –

पाँचौं सूर्य, बुध र शुक्रको प्रभावले मनमा ठूलो उत्साह र उमङ्गको सिर्जना हुनेछ । पढाइलेखाइ र बौद्धिक क्रियाकलापका लागि उचित समय छ, तर चिन्तनमननमा बढी निर्लिप्त हुनु पनि हानिकारक बन्नसक्छ । आकस्मिक यात्राको अवसर आउन सक्छ । त्यस्तै भाग्यभावमा बसेको मंगल र शनिश्चरको प्रभाव पनि शुभकारक छ । घरपरिवारका बृद्ध सदस्यबाट सहयोग र आशीर्वचन मिल्नेछ । दूरदराज वा दुर्गम स्थानमा गरिएको यात्रा सफल हुनेछ । आम्दानीका मार्ग बढ्ने छन् र आयका नयाँनयाँ स्रोतहरू प्राप्त हुनेछन् । श्रावण २२ गतेका दिन सातौं भावमा प्रवेश गर्ने बृहस्पतिले त्यसपछि एक वर्षसम्म महत्त्वाकांक्षा परिपूर्ति गर्न मद्दत गर्ने लक्षण छ । घरपरिवार र मातापितासँग सुमधुर सम्बन्ध कायम हुनेछ । बाह्रौं भावको केतुका कारण अनियमित र बेठिक कामका कारण चिन्तित बन्नु पर्नेछ । सनक र उन्मादबाट प्रेरित भएर गरेको कामकाजबाट हानि पुग्नेछ । खास गरी यस महिनाको ०७, ०८, ०९, १५, १६, १७, २५, २६ र २७ गतेका दिन अशुभ परिणाम प्राप्त हुने संकेत देखिन्छ ।